Həmin gün

Həmin gün
bu balaca şəhərin
kibrit-kibrit daxmalarında
işıqlar daha gur yansın
istəyirəm,
insanlar daha gümrah oyansınlar,
pəncərələr daha geniş açılsın
ümidlərə... 


Həmin gün
kimsə ölməsin buralarda
mən də gizlədim
hələ də səni Tanrım bildiyimi...

Səhərin alatoranında
Azan səsinə açım əllərimi,
ovuclarımın içi yansın,
gözlərindən
Günəş boylansın
ümidlərə açılmış
pəncərələrə...

Həmin gün
kimsə bilməsin buralarda,
mən də gizlədim
hələ də sənin üçün öldüyümü...

Qayıdacağın gündən danışıram...
Qayıdacağım gündən...